TALUMPATI

Ang Papel na May Tinig

Malapit na naman ang election; ito ay dapat ang simula ng isang bagong kabanata sa ating bansa na puno ng pag-asa, pero bakit parang paulit-ulit ang mga pangyayari? Ang ating mga balota ay nagiging sanhi ng takot at panlilinlang sa halip na magdulot ng Magandang pagbabago sa ating bansa. Ang mga taong nakasulat sa ating mga balota ay mga taong may mga bahid ng kasalanan, kasakiman, at pang-aabuso, hindi mga bayani. Nakikita na natin ito sa nakaraan at tila nakikita din natin ngayon—mga pulitikong magnanakaw, mandaraya, at nagpakasasa sa yaman ng bansa ay bumalik upang humingi muli ng ating mga boto. Ang ilan sa kanila ay may mga kasong hindi pa nalutas at ang iba ay kilala sa kanilang mga pagkakasangkot sa krimen. Gayunpaman, ano ang dahilan kung bakit sila pa rin ang mga kandidato sa balota?

 

Ito ang realidad na ipinapakita sa pelikulang “Balota.” Ang ating eleksyon ay isang sistema na puno ng kasinungalingan, kung saan ang pananakot at pagbili ng boto ay humahadlang sa boses ng mamamayan. Ang tanong ay, hanggang kailan tayo magpaloko? Hanggang kailan natin hahayaan ang mga pulitikong sumisira sa batas na tumakbo para sa posisyon sa ating gobyerno? Hindi tayo dapat maging bulag sa kanilang matatamis na salita. Huwag tayong mabingi sa kanilang paulit-ulit na pangakong napapako. Ang eleksyon ay isang responsibilidad na dapat gampanan ng bawat mamamayan ng Pilipinas; ito ay hindi isang laro ng kapangyarihan. Ang ating boto ay hindi lamang isang papel, ito ay isang papel na nagtataglay ng ating boses, pag-asa, at ating kinabukasan.

 

Iginiit ni Jose Rizal na ang mga kabataan ang pag-asa ng bayan. At tayo ay hindi bulag. Alam natin ang kasaysayan ng pandaraya, pang-aabuso, at kasakiman mula sa mga taong may kapangyarihan. Huwag hayaang lasunin ang ating isipan sa mga sinungaling politiko. Hindi tayo mga manika na basta-basta nilang makontrol sa pamamagitan ng matatamis na pangako. Ang kaalaman at kakayahang pumili ay nasa atin. Ang pagboto ay isang kapangyarihan na meron tayo na kayang pigilan ang pagwasak ng ating bayan. Huwag nating hayaang muling maupo ang mga kriminal at mandaraya sa ating gobyerno. Pumili tayo ng mga taong tapat, may malasakit, at tunay na naglilingkod. Sa huli, nasa kamay natin ang ating kinabukasan. Gamitin natin ang ating talino at boses. Vote wisely!